25 de outubro de 2026 · 3 min de lectura
Camiño de Santiago en Semana Santa 2027: datas, tramo e reservas
A Semana Santa de 2027 vai do 21 ao 28 de marzo, en pleno Ano Santo. Que tramo facer nunha semana, que tempo agardar e cando reservar.
Revisado polo equipo de Xacobea · outubro de 2026
En 2027 a Semana Santa vai do Domingo de Ramos, 21 de marzo, ao Domingo de Pascua, 28 de marzo. É o primeiro gran pico do Ano Santo: a Porta Santa ábrese o 31 de decembro de 2026 e, con varios días de festa seguidos, os últimos 100 km énchense antes ca en calquera primavera normal.
Se queres camiñar esa semana, pódese. Só cómpre decidir cedo o tramo, o día de saída e as camas.
Que tramo facer nunha semana
Con sete ou oito días libres caben os 100 km que pide a Compostela. Tres opcións:
- Sarria – Santiago, 115 km en cinco etapas. O clásico e tamén o máis concorrido en Pascua. Guía de Sarria a Santiago.
- Tui – Santiago, 118 km en seis etapas polo Camiño Portugués. Ambiente animado sen a presión do Francés. Guía desde Tui.
- Ferrol – Santiago, 112 km polo Camiño Inglés. O máis tranquilo dos tres en marzo e con menos aloxamento, así que se reserva igual de cedo. Guía do Camiño Inglés.
Un calendario que funciona
O plan con menos présa para o Francés:
- Sábado 20 de marzo: chegada a Sarria e primeiro selo na credencial.
- Domingo 21 a xoves 25: cinco etapas a pé.
- Xoves Santo, 25: chegada a Santiago a mediodía.
- Venres 26 e sábado 27: marxe por se unha etapa se alonga, Compostela e cidade.
Chegar antes do Venres Santo ten vantaxe: a Oficina do Peregrino e a praza do Obradoiro están máis cheas canto máis se achega o domingo.
Tes flexibilidade? A semana anterior, do 14 ao 20 de marzo, é moito máis tranquila. A de despois de Pascua segue con bastante xente. Velo semana a semana no calendario de afluencia de 2027.
O tempo a finais de marzo
En Santiago, marzo deixa mínimas duns 5 °C e máximas de 15 °C, con chuvia case un día de cada dous. Leva chubasqueiro de verdade, unha capa que abrigue para as primeiras horas e calzado xa domado. O demais, na lista da mochila.
Un detalle que poucos teñen en conta: ese mesmo domingo de Pascua adiántase a hora. Desde ese día amence pasadas as 8:30, así que as saídas de madrugada fanse ás escuras: frontal na mochila.
Cando reservar
Xa. En Sarria, Portomarín, Palas de Rei, Arzúa ou O Pedrouzo, os cuartos privados de Semana Santa esgótanse con meses de antelación, e en Ano Santo aínda antes. Conta con 45–60 € por noite en pensión ou casa de turismo rural.
Reserva as cinco ou seis noites seguidas antes de mercar o transporte. Se unha noite falla, a etapa descadra e o resto tamén. En cada etapa de Xacobea ves os aloxamentos do final do tramo con prezo datado; se están completos, mira a vila anterior ou a seguinte.
Para todo o que cambia este ano tes a guía do Ano Santo Xacobeo 2027, e para os selos, como conseguir a Compostela.
Se prefires que cho deixemos todo pechado, pide orzamento para a túa Semana Santa mentres aínda quedan datas.
Preguntas frecuentes
Que días son festivos na Semana Santa de 2027?
O Venres Santo (26 de marzo) é festivo estatal e o Xoves Santo (25 de marzo) adoita selo en case todas as comunidades. Por iso os peregrinos de aquí coinciden cos de toda Europa esa mesma semana.
Cambia algo para conseguir a Compostela en Ano Santo?
Non. Seguen facendo falta 100 km a pé e dous selos ao día. O que cambia é a Porta Santa da catedral, aberta durante todo 2027.
